إيه هو ال”الباور كوماندر” و بيعمل إيه للموتوسيكل؟

تعديل الموتوسيكل

التعديلات هو جزء لا يتجزء من الموتوسيكل. أى ركيب بيجيب موتوسيكل أو بيشترى واحد مستعمل دائماً بيسأل عن التعديلات المتركبة فيه و إيه إمكانية إنه يزودها. عشان نبقى صرحاء مع بعض، التعديلات هى سبب إفلاسنا، بس مانقدرش نعيش من غيرها كركيبة سواء التعديل ده كان لأداء الموتوسيكل أو للمنظر.

الPower Commander بيعمل إيه للموتوسيكل.

أول حاجتين معظم الركيبة بتفكر فيهم كدعديلات هم الشكمان و فلتر الهواء (لو هنتكلم عن التعديلات للأداء). كل تعديل من دول هنتكلم عنهم بالتفصيل إن شاء الله فى مقالات جاية. بس إحنا محتاجين نبص للموضوع بنظرة أوسع شوية و هو إيه البند اللى التعديلين دول بيقعوا تحته.

تعديل الشكمانات (سواء علبة أو نظام كامل) بالإضافة لهواء الفلتر بيعتبروا تحت بند نسبة خلط الهواء/البنزين (هواء بمعنى أصح). فلتر الهواء التعديل بيدخل هواء أكتر و الشكمان التعديل بيسمح بتسريب العادم بطريقة أفضل (إلى جانب تخفيف الوزن و حاجات تانية طبعاً).

برده إيه علاقة الPower Commander بالكلام ده؟

الPower Commander بقى ده برده تبع بند نسبة خلط الهواء/البنزين. ده جهاز صغير كده بيتحط ما بين وحدة كارتة الكهرباء الأساسية للموتوسيكل (ECU) و رشاشات البنزين (نظام ضخ البنزين عامة). الجهاز ده بيعمل على تحقيق أفضل نسبة خلط للبنزين مع الهواء و اللى بيديك فى الآخر قوة أكبر و عزم أعلى.

هل التعديل ده مقتصر على الموتوسيكلات الRacer و الStreetfighter؟

على عكس الفكرة السائدة ما بين الركيبة إن الPower Commander مقتصر على الموتوسيكلات اللى بتحب الجرى بس، إلا إنه ممكن يتركب فى موتوسيكلات تانية كتير بما فيهم الTouring.

طريقة تركيب الPower Commander و شبح الMapping

طريقة تركيبة الجهاز نفسه بتختلف من موتوسيكل للتانى. ده بيرجع فى الإساس لإختلاف أماكن الكارتة الأساسية و نظام ضخ البنزين من موتوسيكل للتانى (كما هو الحال فى أى تعديل تانى). معظم الموتوسيكلات الCruiser بيبقى أسهل فى التركيب لأن الموتور و الكهرباء بيبقى أسهل فى الوصول إليهم من الRacer المتغطى بفيبر كتير لكن ديه مش قاعدة عامة طبعاً.

لو أنت حافظ مكان كل حاجة فى موتوسيكلك و عندك العدة و بتحب تشتغل فى موتوسيكلك بنفسك، الموضوع مش صعب. غير كده، يفضل إنك تخلى حد بيشتغل فى الموتوسيكلات هو اللى يركبهولك.

نيجى بقى للجزء الأهم و هو الMapping. الجزء ده زى كده إنك تنزل Windows لكمبيوتر جديد. كل اللى هتعملوا إنك تدخل على موقع المصنع (Dyno Jet) و تنزل الMap المضبوطة على الكمبيوتر بتاعك. الموقع فيه أكتر من ٢٠،٠٠٠ Map لجميع الموديلات و التعديلات المتركبة فيها. شوف إنت نوع مكنتك إيه و التعديلات المتركبة فيها و نزل الMap بتاعة موتوسيكلك.

وصل الPower Commander بالكمبيوتر عن طريق الUSB و حمل الMap و إطلع جرب الموتوسيكل.

معظم الركيبة بتخاف من الMapping و بتعتبره علوم فضاء و حاجة معقدة و لكن الموضوع مش صعب زى ما الناس متخيله.

ده كده أبسط طريقة للMapping. فيه تعديلات كتير فى ضبط الPower Commander و بتختلف من ركيب للتانى. أنت ممكن توصل لدرجة إنك تعمله Auto Tune بحيث هو يضبط ضخ البنزين مع الهواء على حسب كمية ضغط الجو و كمية الهواء أوتوماتيكياً (ده لو الجو أتغير و أنت راكب مثلاً) أو تغير فى نسبة الخلط نفسها و تربطها بغيار المكنة و تعديلات تانية كتير لا تنتهى……

أنواع الPower Commander الأكثر إنتشاراً.

الباور كوماندر
Power Commander 5

أكتر نوعين منتشرين هم الPower Comander 5 (الأحدث) و الPower Commander 3. فيه شوية فروق ما بينهم زى إن ال5 مثلاً أصغر فى الحجم و فيه مساحة أكبر للتعديل (خصوصاً فى نسب الخلط) أو إنه سهل يتركب مع نظام ال Quick Shifter. العامل الأكبر و الأهم اللى هيخليك تحسم أنهى نوع Power Commander تشتريه هو نوع موتوسيكلك و الموديل بتاعه (اللى ينفع يتركب عليه).

الخلاصة.

الكلام اللى إحنا قلناه ده تقريباً ١٪‏ من اللى ممكن يتقال عن الPower Commander (سواء فى الأنواع أو طرق التظبيط). الجهاز ده ليه طرق تظبيط كتير جداً (و كل ركيب و دماغه) و لما بيتظبط صح على الموتوسيكل بيفرق جداً فى الأداء بتاعه خصوصاً لو متركب مع التعديلات التانية اللى فى نفس البند زى الشكمان و فلتر الهواء. نرجو إننا نكون أضفنا معلومات قيمة ليكم.