أول حلبة سباق موتوكروس فى مصر: Motoclub Egypt حلبة سباق

moto track

دلوقى موسم الأجازات و الناس كلها مسافرة. إحنا كمان سافرنا الجونة فى الأجازة ديه عشان نحضر حاجة جديدة تماماً و اللى إحنا واثقين إنها هتعجب الركيبة كلها.

فى الفترة الأخيرة تم إفتتاح أول حلبة سباق موتوكروس فى مصر إسمها Motoclub Egypt. الحلبة ديه قررت إنها تستضيف أول سباق رسمى ليها فى الأجازة اللى فاتت و تم دعوتنا لتغطية الحدث.

قبل ما نتكلم عن السباق نفسه، تعالوا نعرف أكتر عن المكان ده.

حلبة سباق الموتوكروس.

motocross racing

حلبة السباق متقسمة لجزئين؛ جزء خارجى للمبتدئين و ديه حلبة بمسافة ١٢٠٠متر تقريباً. الجزء الخارجى الملفات فيها مش جامدة و مناسبة لركيبة الموتوكروس الجداد. أما الحلبة الداخلية فا الموضوع مختلف تماماً و ده نتيجة الملفات الصعبة بالإضافة إلى “المنطاط” أو “الRamps” العالية. الحلبة الداخلية مسافتها تقريباً ١٨٠٠ متر و ديه مناسبة جداً لركيبة الموتوكروس المتمرسة.

النادى.

motocross track

القاعدة فوق فى المكان كاشفة معظم حلبة السباق. المكان بيقدم المشروبات و الأكل لكل الزائرين. بمعنى أصح حتى لو أنت مش ركيب و عايز تقعد فى مكان كويس بيطل على منظر كويس (خصوصاً أوقات الغروب) و تتفرج على ناس بتركب موتوسيكلات موتوكروس، Motoclub Egypt بيوفرلك الخدمة ديه.

السباق.

أول حلبة موتوكروس فى مصر

السباق كان بيضم ٣ فئات أساسية و هم ال٢٥٠cc و ال ٤٥٠cc و الATV مقسومة على مجموعتين. كل مجموعة كانت مطالب منها إنها تخلص ٢٠ لفة (١٠ لفات ثم إستراحة ثم ١٠ تانيين). السباق كان بيتحسب بأقصر وقت للمتسابق فى كل فئة بعد الإنتهاء من اللفات كلها (مجمعة)

المتسابقين (و الجمهور) تم تعريفهم بقوانين المسابقة، الحلبة، و الأعلام قبل بداية السباق. التحضير للسباق تضمن وجود Marshals و سيارات إسعاف بالإضافة لسيارات إنقاذ. التوقيت كان بتم حسابه بالطريقة التقليدية (stopwatch) بالإضافة إلى كاميرات فيديو (time stamps) لضمان صحة النتائج.

الجدير بالذكر إن كل المتسابقين أخدوا جولة تعريفية على الحلبة قبل السباق و ده لتعريفهم بالملفات (خصوصا الخطرة) و ” Ramps”

أما بالنسبة للجزء الترفيهى فكان فيه DJ على مدار اليوم من الساعة ٢ إلى ٧ مساء و المكان كان بيقدم مشروبات مجانية لكل الجمهور.

اليوم إنتهى بتكريم المركز الأول و الثانى و الثالث لكل فئة بميداليات و هدايا مقدمة من الرعاه للحدث زى الجونة و أوراسكوم بالإضافة إلى كافيه Moods و Slider للرياضات المائية و رعاه تانيين كتير( الهدايا تضمنت وجبات عشاء مجانية, Day Use فى بعض الفنادق فى الجونة و Free slides  من Slider). السباق شارك فيه متسابقين مصريين و أجانب بالإضافة إلى حضور كتير من الصحافة و الشخصيات العامة.

لو عايز تعرف تاخد جولة فى المكان و تشوف يوم السباق كان ماشى إزاى ممكن تتفرج على الفيديو ده.

الخلاصة.

الموضوع من وجهة نظرنا كان منظم بشكل كبير سواء للمتسابقين أو الجمهور. أكيد طبعاً كان فيه بعض التعليقات السلبية إلا إن الموضوع بشكل عام كان كويس جداً. الحلبة مفتوحة للجمهور فى غير السباقات و بتوفر للركيب الموتوسيكل و الgear لو هو متوفر معاه بالإضافة لتوفير بعض النصائح لركيبة الموتوكروس الجدد.

إحنا فخورين بإن فيه ناس فكرت إنها تنشىء أول حلبة سباق موتوكروس فى مصر و تدعم الرياضة ديه للركيبة. إحنا كمجلة بنتمنى ليهم التوفيق و النجاح المستمر و إن شاء الله يتم تنظيم فيها مسابقات دولية قى وقت قريب جدا.

ديه بعض الصور ليوم السباق فى Motoclub Egypt  بالجونة.

[metaslider id=1738]