مبادرة حول مصر على موتوسيكل تحطم رقم قياسى جديد

رقم قياسى حول مصر على موتوسيكل

الخميس اللى فات (بتاريخ ٢٩ يونيو ٢٠١٧) قام على عبده، مؤسس مبادرة حول مصر على موتوسيكل بالتعاون مع Motoclub Egypt بمحاولة لتحطيم رقم قياسى جديد. الرقم المرة ديه كان أطول مسافة على موتوسيكل Motocross خلال ٢٤ ساعة دخال حلبة سباق.

 

حامل الرقم القياسى السابق كان Paul Oughton اللى قدر إنه يقطع مسافة ٥٦٥.٦٤ كم على موتوسيكل Yamaha YZ250. الرقم القياسى اللى فات إتعمل فى المملكة المتحدة عام ٢٠١٣، لكن على عبده قرر إنه يكسر الرقم ده على الأراضى المصرية (فى الجونة تحديداً) لخدمة أهداف مبادرته اللى أحدها تشجيع السياحة فى مصر.

 

أطول مسافة على موتوسيكل Motocross خلال ٢٤ ساعة.

 

حلبة سباق Motoclub Egypt قررت إنها تستضيف محاولة كسر الرقم القياسى. فى الحقيقة فريق العمل كان منظم جداً و كل شخص فى الفريق كان ليه دور محدد. الدعم المعنوى اللى الفريق قدمه خلال ٢٤ ساعة كان ملحوظ واللى إحنا بنؤمن إنه كان مهم لعلى أثناء محاولته لكسر الرقم.

 

الفريق كان مكون من عدة أقسام زى الصيانة و التوثيق و الفريق الطبى (الإسعاف) و اللى كانوا متعاونين مع بعض حتى آخر لفة فى حلبة السباق.

 

العقبات أثناء محاولة تحطيم الرقم القياسى.

 

أول عقبة كانت سرعة الرياح العالية (المحملة بالأتربة) اللى وصلت ل ٢٥ عقدة تقريباً فى البداية. الحرارة العالية كمان كان ليها عامل سلبى و ده لإنها وصلت ل ٤٠ درجة مؤية تقريباً وقت الظهر و اللى كانت سبب فى زيادة الحمل و الإرهاق على الموتوسيكل و على عبده شخصياً. مؤسس المبادرة كان بياخد إستراحات بين اللفات فى حلبة السباق لمدة لا تزيد عن 10 دقائق تقريبا للأكل و الشرب و التزود بالبنزين فى بعض الأحيان  (تم أخذ إستراحة واحدة طويلة فقط).

 

خلال ٢٤ ساعة سواقة، فريق العمل إضطر إنه يغير فردتين كاوتش الموتوسيكل (الأمامية و الخلفية) اللى أخرت عبده تقريباً ساعتين خلال محاولته لكسر الرقم. الموضوع كان مرهق كمان فى "الملفات" داخل الحلبة بسبب الرياح الشديدة اللى عملت تكوينات رملية خطرة.

 

على عبده نجح إنه كسر الرقم الحالى بإنه يقطع ٦٠١ كم خلال ٢٤ ساعة  على موتوسيكل Honda Tornado 250. فريق العمل شغال على تنسيق التوثيقات حالياً عشان يبعته لGuinness  Book of Records و يسجل الرقم القياسى الجديد رسمياً.

سباق عالمى على حلبة سباق موتوسيكلات مصرية.

الموضوع لم ينتهى عند تحقيق الرقم القياسى. حلبة السباق Motolcub Egypt نظمت أول سباق عالمى رسمى ليها برعاية الإتحاد المصرى للسيارات و الدراجات النارية بالإضافة و بمشاركة إتحاد چيبوتى للدراجات النارية مع مشاركة عدد من المتسابقين الدوليين من الولايات المتحدة، المملكة المتحدة، فرنسا، و إيطاليا.

السباق كان منقسم إلى فئتين (٢٥٠ و ٤٥٠ cc). كل فئة كانت مقسومة الى مجموعتين و كل مجموعة كانت مطالبة إنها تخلص ٢٠ لفة على مرحلتين (١٠ لفات فى كل مرحلة). ديه مش أول مرة نحضر سباق فى حلبة Motoclub و كان فيه تحسن ملحوظ جداً فى التنظيم خلال السباق ده.

لو حابب تعرف إيه اللى فاتك فى محاولة تحطيم الرقم القياسى و السباق الدولى، إتفرج على الڤيديو ده....

الخلاصة.

رحلتنا للجنوب (محافظة البحر الأحمر) عمرها ما كانت بالإثارة ديه قبل كده. الحدث كان فعلاً يستاهل سواقة ٧٣٠ كم تقريباً لتغطيته.على عبده بقاله فتره بيكسر أرقام قياسية عالمية تحت "مظلة" مبادرة حول مصر على موتوسيكل لخدمة أهدافها و هو صرح لنا إن لسه فيه أرقام قياسية تانية هيتم تحطيمها إن شاء الله قريباً.

مختارتنا من منتجات الموتوسيكلات