٦ أسباب تخليك تشترى سكوتر حتى لو عندك موتوسيكل

شراء سكوتر مصر

معظم الناس حتى اللى مش ركيبة إبتدت تدرك مدى أهمية السكوتر كوسيلة مواصلات بديلة للعربيات خصوصاً فى مصر. ولكن إحنا قررنا نتناول الموضوع ده هنا من منظور مختلف شوية. فيه أسباب كتير تخليك حتى لو عندك موتوسيكل عادى (Racer,Cruiser, ADV,…الخ) تخليك تفكر إنك تجيب سكوتر فى مصر.

و إن كانت معظم الأسباب متشابهة للناس اللى قررت تركن عربياتها و تتنقل بالسكوتر، إلا إن فيه بعض الإختلافات البسيطة.

تعالوا نعرف أكتر إحنا قصدنا إيه.

أسعار البنزين المتزايدة (و المتوقع إنها تزيد أكتر)

شراء سكوتر
إستثمر فلوسك صح

ده أول سبب اللى بيخلى الناس تركن عربيتها و تركب موتوسيكل، بس هل هو سبب كافى إنه يخليك تركن الموتوسيكل و تركب سكوتر؟

خلينا متفقين إن الموتوسيكلات الكبيرة معظمها لخدمة غرض الهواية أكتر من التنقل. يعنى إنت لما تبقى الدنيا بايظة معاك أو قاعد زهقان، بتنزل تلف بالموتوسيكل شوية أو بتفصل فى نهاية الإسبوع ب”رايد” لوحدك أو مع جروب.

لكن لما تيجى تقرر إنك تنزل تقضى مشاوير فى عز الزحمة و الحر. كلنا بنفكر شوية قبل ما ننزل حتى بالموتوسيكل.

السكوتر مهماً كان نوعه و حجمه بيبقى إلى حد كبير أوفر فى البنزين من الموتوسيكلات الكبيرة. الموتوسيكلات الكبيرة عادة يا RPM عالى و CC قليل أو العكس أو الأتنين مع بعض (و ده خراب بيوت و إستهلاكه أكتر من العربية).

معظم السكوترات اللى الناس بتستخدمها للتنقل (عادة CC صغير) بيبقى أوفر كتير من الموتوسيكلات العادية.

قدرة مناورة أعلى؟

الحاجة التانية المهمة هى قدرة المناورة العالية و المهمة جداً وقت الزحمة. تلاقى موتوسيكل Racer محترم مثلاً واقف فى الزحمة فى حتة معينة زيه زى العربية بالضبط عشان هو ربع جادون و مش عارف يكسر و يخلع من الزحمة. أو موتوسيكل Cruiser أو أى نوع تانى معاه مساحة فى الجادون بس حجم الموتوسيكل كبير و مش عارف يعدى.

كل ده طبعاً ما جبناش سيرة الوزن اللى بتحمله على رجلك و السخونية اللى طالعة عليك من موتور الموتوسيكل و يا سلام بقى لو أنت فى الصيف و الشمس ضاربة فيك من فوق و أنت مزنوق فى الزحمة.

خلينا نعترف إن إحنا كركيبة موتوسيكلات بنبقى واقفين فى الزحمة بنحقد على بتوع السكوترز لما يعدوا جنبنا زينا زى بتوع العربيات.

مش هتحتاج تبيع شقتك عشان الصيانة الدورية.

تغيير زيت، فلتر، كاوتش و حاجات تانية كتير فى الList بتمثل كابوس لأى ركيب فى الصيانة الدورية. إحنا مش هنتكلم على أسعار معينة لقطع غيار السكوتر لإنها متفاوتة، لكن إحنا بنأكد لكم إننا عمرنا ما شفنا ركيب سكوتر بيعيط عشان هيغير سير و لا زيت و لا فرده كاوتش حتى.

الموضوع سهل و بسيط.

ركيبة السكوتر معرضين للخطر زيهم زى ركيبة الموتوسيكلات إن ما كنش أكتر عشان هما حجهم أصغر و العربيات مش بتشفهم، و لكن عندهم ميزة هايلة و هى إنه بيركز أكتر على الطريق و المحيط من السواقة. معظم السكوترات أوتوماتيك، يعنى بنزين و فرامل، يعنى تنسى إنك فى الزحمة أيدك توجعك من ماسكة الدبرياچ و إن تبقى نسبة تركيزك عالية فى الملفات و ركوب الموتوسيكل العادى. (وركوب الموتوسيكلات فى الشتاء ديه قصة تانية خالص)

و مين فينا ما بيحبش سواقة الأوتوماتيك؟

هيصد معاك فى المسافت الطويلة برده.

السكوتر بيطلع طرق طويلة عادى يا جماعة و الله. يعنى لو عندك مشوار بعيد شوية أو هتمشى على طريق سريع مش هيقولك لأ. الفكرة كلها إن فيه إحتياطات أكتر لازم تخدها عشان متجهدش الموتور (لو سفر) و إحتيطات تانية فى السواقة نتيجة الوزن الخفيف و كده. السكوتر هيمشى معاك على الطريق الدولى و الدائرى و كله.

ركوبة مريحة.

سكوتر مصر

طبعاً فيه موتوسيكلات ركوبتها أريح من السكوتر بكتير (إخوانا بتوع الTouring و بعض Cruisers). و لكن هل بتجمع ما بين كل النقط اللى إتكلمنا فيها قبل كده؟

ركيبة الRacer دول إحنا مش هنجيب سيرتهم فى موضوع القاعدة المريحة أصلاً

وسيلة مواصلات لأهم مشوار فى اليوم

أى موتوسيكل ممكن تروح بيه الشغل، و لكن السكوتر أفضلهم. بغض النظر عن أنك عادة مواعيد الذهاب و العودة من الشغل هى أوقات الذروة، و لكن قعدة السكوتر بتسمحلك (أنت أو إنتى) أنك تلبس هدوم الشغل و إنت مطمن. خصوصاً لو من الناس اللى بتلبس Formal للشغل.

كفاية إن رجليك جوه الموتوسيكل و محمية من الطين و التراب طول السكة. آه هيبقى شكلك cool أكتر و أنت لابس البدلة و راكب موتوسيكل Racer. بس عبقال ما توصل المكتب هتبقى محتاج تغير هدوم الشغل.

نرجو إننا نكون أضفنا ليكم معلومات قيمة و إننا نكون نجحنا إننا نخليكوا تشوفوا السكوترز من منظور مختلف، خصوصاً لو أنت أصلاً من الركيبة.