Austin MotoGP 2017 المتسابق الأسبانى يفوز بالمركز الأول فى التأهيل لسباق

Marc Marquez Qualified on Pole for the Austin MotoGP 2017.

فاز المتسابق Marc Marquez التابع لفريق Honda Repsol بالمركز الأول إستعداداً لسباق Austin بحلبة سباق The Circuit of Americas بولاية تكساس الأمريكية.

نتائج التأهيل كانت متقاربة جداً من بعض. “المعركة” فى اللفة الأخيرة ما بين Marc و Vinales التابع لفريق Yamaha Movistar كانت ممتعة جداً و اللى إنتهت بفوز Marc بفارق 0.13 ثانية. البرنس الكبير (والقديم) Valentino Rossi جه فى المركز الثالث بعد زميله Vinales اللى فى نفس الفريق بفارق 0.923 ثانية.

الحتة السخنة اللى فى دورات التأهيل (غير اللفة الأخيرة) كانت الملاحمة ما بين Rossi و Vinales اللى كانت هتكون السبب فى حادثة ما بين الأتنين. Vinales كان داخل الملف رقم ١٨ بسرعة مضبوطة و ماسك أسرع خط فى الملف و لكن Rossi كسر عليه و خلاه ينقل لخط سير أوسع و أبطأ. ممكن تشوف الموضوع بصورة أوضح فى الڤيديو ده.

على الرغم من إنفعال Vinales اللى ظاهر فى الڤيديو بوضوح، إلا إنه أكد إنه بالبلدى كده ” مش شايل من زميله” و أكد إنه أكيد Rossi ماكنش شايفه و إن أى حد معرض إنه يبقى فى الموقف ده و إنه متفهم اللى حصل ده تماماً.

المتسابق Marc Marquez ليه إنتصارات كتير فى حلبة السباق ديه ( ٥ مرات على التوالى عشان نبقى دقيقين) و لكن المرة ديه بيأكد إن الموضوع مختلف بوجود Vinales اللى هيكون السبب فى إن Marc يبذل مجهود أكبر للفوز فى السباق.

المتسابق Vinales هو الأول من حيث النقاط فى موسم MotoGP 2017 ده بيرجع لفوزه فى أول سباقين فى قطر و الأرجنتين. المتسابق Marc فى المركز الثامن و ده نتيجة حادثته فى الأرجنتين إلى أدت لوجود فراغ كبير فى التوقيت و أنه ينزل للمركز ده.

الحالة العامة لحلبة “الأمريكتيين”.

كتير من المتسابقين إشتكوا من الحالة العامة للحلبة خصوصاً فيما يخص المطبات. الموضوع و صل بتشبيه الحلبة ديه بحلبات الsupercross على حد قول المتسابق Jorge Lorenzo المشهور. الحلبة ديه عمرها ٦ سنوات و لكن من الواضح إنها محتاجة شوية شغل.

اللى خلى الموضوع أصعب كمان كان حالة الطقس الباردة اللى أدت إلى حدوث الكثير من الحوادث وقت التمرين. المتسابق Alex Rin التابع لفريق Suzuki كسر أيده الشمال (الرسغ) أثناء التمرين و اللى أدى الى أستبعاده من المشاركة فى السباق نفسه.

المتسابق Marc كان هيحصله فى الإصابة و الإستبعاد بعد ما عمل حادثة برده أثناء التمرين و اللى كانت هتسبب له إصابة خطيرة بعد ما الموتوسيكل إتقلب على رجله و لكنه كمل عادى بدون إصابات.

المتسابق Marquez أضاف إنه إضطر يجرب كذا موتوسيكل فى التمرين و كل واحد فيهم كان متظبط بإعدادات مختلفة تماماً عشان يعرف أنهى واحد فيهم المناسب للحلبة ديه. المتسابق الأسبانى قال إن ده السبب الرئيسى لفوزه بالمركز الأول فى التأهيلات و إن أختياره للموتوسيكل اللى وفرله الإتزان المظبوط على الحلبة كان سر نجاحه.

المتسابق Valentino Rossi  كانت بدايته موفقة فى الموسم ده فى سباق قطر (على حد قوله). و لكن من الواضح إن المنافسة شديدة جدا بينه و بين المتسابقين التانيين.

كل الركيبة المهتمة بسباقات الMotoGP متحمسين جداً للسباق ده وقفاً لنتائج التأهيل. هل المتسابق Marc هيقدر يفوز و يقلل الفرق فى النقاط و لا Vinales هيكمل إنتصاراته المستمرة من أول الموسم فى السباقات؟ أظن إننا هنعرف الرد ده قريب قوى.